Sunday, 16 June 2019 16:22

ፕሬዝደንት ሣህለ ወርቅ ዘውዴ አልማዝ ደረሰን በስልክ አነጋገሩ፡፡

  • Print
  • Email

ወንድ ልጅ ከተገላገለች አንድ ሰዐት በኋላ ያለባትን ከፍተኛ የድካም ስሜት እና ተያያዥ ችግሮችን በመቋቋም የ10ኛ ክፍል ብሄራዊ ፈተና የተፈተነችውን አልማዝ ደረሰን ፕሬዝደንት ሣህለ ወርቅ ዘውዴ ስልክ ደውለው አነጋግረዋታል፤ አበረታታዋታል፡፡

ክብርት ፕሬዝደንቷ በመልዕክታቸውም አልማዝን "እንኳን ደስ አለሽ" ካሉ በኋላ "ጽናት፤እምነት እና ብርታት ምን ማለት እንደሆነ በተግባር አሳይተሻል" ብለዋታል፡፡

ለሴቶች እኩልነት ለሚታገሉ ሁሉ ትምህርት ከችግር መውጫ ትልቁ መሳሪያ መሆኑን የሚያመለክት መልዕክት ማስተላለፏንም ፕሬዝደንቷ በስልክ መልዕክታቸው ገልጸውላታል፡፡ በፈተናው መልካም ውጤት እንዲገጥማት የተመኙት ፕሬዝደንት ሣህለ ወርቅ ዘውዴ በቀጣይም የአሁኑን አይነት ቁርጠኝነቷን በማጠናከር ህልሟን ከዳር ማድረስ እንዳለባት ምክራቸውን አስተላልፈዋል፡፡

ሁኔታዎችን በማመቻቸትየ21 አመቷ አልማዝ ለፈተና እንድትቀርብ አስተዋጽዎ ላደረጉ አካላት ሁሉ ምስጋና ይገባቸዋል ብለዋል፡፡ባገኘነው መረጃ መሰረት ልክ እንደ አልማዝ ሁሉ ከወሊድ በኋላ በአጭር ጊዜ ውስጥ ፈተናቸውን የተፈተኑ ሌሎች ጠንካራ ሴት ተማሪዎች በተለያዩ አካባቢዎች አሉ፡፡እነዚሀንም አድራሻቸውን በማፈላለግ ተመሳሳይ የማበረታቻ መልዕክት ለማስተላለፍ ጥረት ይደረጋል፡፡

Leave a comment